Feeds:
Posts
Comments

Archive for October, 2010

പുലരാന്‍ മടിക്കുന്നു സന്ധ്യപോലും, എന്‍റെ-
യൊരുപാടു നോവുകള്‍ കരഞ്ഞുതീര്‍ക്കാന്‍.
അവളോ, സ്വയം തീര്‍ത്ത മൌനത്തിനാല്‍, എന്നെ-
യൊരുപാടു ദൂരേക്കകറ്റി നിര്‍ത്തുന്നു.
അരികെ, ഏകാകിയായ്‌ ഞാനുരുകുന്നു,
മൂകമെന്‍, കണ്ണീര്‍ കണങ്ങളെ സാക്ഷിനിര്‍ത്തി.

ഒറ്റക്കിരിക്കുവാനായല്ല ഞാനെന്‍റെ
ദുഖങ്ങള്‍പോലും പകുത്തുനല്കീ…
ഒപ്പം നടക്കുമീ കാലൊച്ച കേള്‍ക്കുവാ-
നല്ലെങ്കിലെന്തിനീ കാതെനിക്ക്‌…
എന്‍റെയൊപ്പം നടക്കുവാനില്ലെങ്കില്‍, നീയെനി –
ക്കില്ലെന്റെ ജീവനും ജീവിതവും.

Advertisements

Read Full Post »

ഇനിയും എനിക്കെന്റെയാത്മ താപങ്ങള്‍ തന്‍
ചിതയിലേക്കൊരു കനല്‍കൂടി നല്‍കാന്‍, കാല –
മിനിയും നിനക്കെന്നു വെച്ചു നീട്ടുന്നതോ,
സ്നേഹമാനെന്നതും വൈപരിത്യം!

ഇനിയെന്റെയുള്ളില്‍ ഞാന്‍ സ്വയമേറ്റു വാങ്ങുവതു-
മൊരു മഞ്ഞു തുള്ളിതന്‍ ശാപനെന്നോ..
ചപലതകളില്ല, കൊടും കാറ്റുമില്ലൊടുവില്‍
പിരിയേണമെന്നതോ വ്യക്ത സത്യം!

നിമിഷങ്ങള്‍ നിറവാര്‍ന്ന സാന്ത്വനങ്ങള്‍, നിന്‍റെ
കനിവൊലും സ്വരജതിയിലാഴ്ന്നിരുന്നാല്‍
അറിയില്ലെനിക്കെന്റെയാത്മാവിനെ,
അതിനുള്ളിലെരിയുന്ന തീജ്വാലയെ

ആകിലറിയാം, എനിക്കെന്നിലെരിയും ചിതയിലേക്കൊരു
മഞ്ഞു തുള്ളിയായ് പെയ്ത സത്തേ, നിന്നെയറിയാം
എനിക്കെന്നിലണയാന്‍ കൊതിക്കുന്ന മണ്‍ചെരാതായ്
ശോകമലിയും വിരഹാര്‍ദ്ര സംഗീതമായ്!

മൂഢ സങ്കല്‍പങ്ങള്‍തന്‍ വിലാപമെന്നോ, എന്‍റെ –
മൂകമാമീ, ദീന സംവേദനങ്ങളും.
അറിയാമെനിക്കിന്നു നല്‍കാവതല്ല നിന്‍
പ്രണയമൊരു തീജ്വാലയാനെങ്കിലും
എന്‍റെ ഹൃദയം തപിക്കുന്നതേറ്റു വാങ്ങാന്‍
തീയിലണയാന്‍ കൊതിക്കുന്നൊരീയല്‍ പോലെ!

Read Full Post »